top of page
ضروري نشارك في المحاضرة ؟
الجواب : اغلب المواد في الجامعات لا , بس في بعض المواد في الجامعات الدكتور بحكي من اول المحاضرة انو في علامات راح يحطها على مدى تفاعل الطلاب مع الدكتور , هالمواد بتكون مواد حرة واختيارية والكل بشارك فيها بسهولة
كيف ممكن الواحد يجيب ٤ بالجامعة ؟!!! حاسة الموضوع كتيير صعب وافضل طريقة للدراسة بشكل عام هي ؟!!
الجواب : مافي شيء صعب اطلاقا , افضل طريقة للدراسة بشكل عام هي حضور المحاضرات , والارتكاز بالدراسة على شيئين : دراسة الشيء الي اخدو الطالب بمحاضرات اليوم , ومراجعة ما اخدو سابقا .. كيف يعني ؟ مثال بسيط
بعد اول اسبوع من الدوام , يوم الاحد مثلا بروح الطالب من الجامعة بدرس محاضرات الاحد , وبراجع المحاضرات الي اخدها الاسبوع الماضي لمحاضرات الاثنين اربعاء .. ليش طيب ؟ لانو نظام المحاضرات في الجامعة قائم على نظام احد ثلاثاء خميس ونظام اثنين اربعاء .. فلو الطالب عندو محاضرة يوم ثلاثاء مثلا , , يوم الاثنين لو راجع محاضرات الي اخدها قبل هيك بكون جدا ممتاز وبكون متابع مع الدكتور اول باول وعارف وين وصل وعارف شو بدو يحكي بالمحاضرات الجاي .. ومن الامور المهمة ايضا حل اسئلة دائما على اي مادة , بتلاقو اسئلة سنوات في المكتبات وفي الجامعة كمان اعملوا جهدكم تحلوهم
ممكن اعرف الاتحادات الموجودة بالجامعة وعن شو هدفها العام وهل بتنصحوا بالانضمام للاتحادات ولا لأ بدي اعرف جميع الاتحادات الموجودة وبدي تلتزمو بالحيادية بهاد الموضوع لاني بعرفكم رح تحطو الاتحاد الاسلامي وتظلموا الباقي بما فيهم
العلماني وشكراً الكم .
الجواب : انت من قبل ما تسأل السؤال عم تظن انو نحن راح نقلك هاد احسن وهاد مو احسن .. صديقي .. كن ملك عقلك وقرارك .. بكرا بتصير بالجامعة وانت كبير وقادر على انك تميز بين الصواب وبين الخطأ بس المهم تكون انسان واقعي وما تكون شخص معبى راسه افكار بغض النظر عن اي طرف .. فقط احكم على ما تراه وما تجربه بنفسك .. واهم شيء .. لا تطلق احكام مسبقة
ايش هن المواد الاختيارية وهل همَّ محسوبات بعدد الساعات ولا بس بنوخذهم في اي سنة من السنين؟
الجواب : في هذه الصفحة
انا مش كتير بالانجليزي .... فممكن يأثر على دراستي ؟... علما أني سجلت طب الأسنان في التكنو موازي
الجواب : اتعب على نفسك بالبداية حتى ترتاح بعد هيك .. اول فصل اعمل جهدك تدرس بجدية وما اضيع اي وقت وباذن الله بتتغلب على هاي النقطة بكل سهولة مع الوقت .
هلئ اول يوم في الجامعة كيف بيكون و كيف ممكن اتعرف ع اصدقاء يكون امبين انهم محترمين ...صراحة خايفة من اول يوم و حاسة كأنو بدي اروح ع صف اول :( ؟؟
الجواب : الوضع بكون طبيعي جدا لا تخافي ^_^ راح نخصص صفحة كاملة للحكي عن اول يوم دوام باذن الله
بقولوا الدراسة بالجامعة غير،، كيف يعني؟
الجواب : الموضوع نسبي يمكن ناس تشوفها اسهل يمكن ناس تشوفها اصعب , غدا بتصيروا بالجامعات وبتجربوا كيف
بالنسبة للدراسه لكل مادة تقريبا كم ساعة أحطلها تحديدا إذا رح أدرس كل يوم والله يجزيكم الخير يا رب
الجواب : من الخطا ان تجعلوا دراستكم مرتبطة بعدد من الساعات , خلو الدراسة مرتبطة بكمية معينة من الانجاز الدراسي .. يعني احكي مثلا انا اليوم بدي اخلص الفصل الاول من المادة وما تقوم من الدراسة الا اذا خلصتو , يمكن تخلصوا بساعتين بثلاث ساعات يمكن اكثر .. بس المهم انك تكون انجزت شيء .. بينما لو حكيت بدي ادرس المادة الفلانية ساعتين يمكن اضلك طول هالساعتين ما تنجز شيء .. اجعلوا الانجاز اساس للمضي في الدراسة
كيف بتكون الصلاة بالجامعة يعني في وقت لنصلي :) وفي اماكن للصلاة بالنسبة للبنات بكل كلية ولا ما في يسلمو الكم
الجواب : الحمد لله المصليات متوفرة في كل مكان تقريبا وفي كل كلية للشباب وللبنات
مرحبا.. شو المفروض اول يوم نعمل؟؟ من ناحيه دراسه + كتب +...؟؟
الجواب : راح نخصص صفحة كاملة لهاد اليوم باذن الله وراح يتم نشرها اليوم بالليل
الدكاتره يلي بعطو المحاضرات عصبيين ع السنافر لو ما فهمو ولا مروئيين بكونو؟
الجواب : 99% بكونوا كويسين وقلبهم طيب بس اكيد الا ما تلاقي بعض الدكاترة الي بغلبو بس ان شاء الله ما بمر عليكم اي دكتور صعب بالتعامل
سؤالي انو طالب الطب بينطلب منو كتير كتب و كل الطلاب بصوروهم .. انا بدي احصل على صورة للكتاب بس مو عارفة من وين و من مين أطلب
الجواب : لو ذكرت الجامعة لجاوبتك لانو كل جامعة بكون في مكاتب محيطة بها بتبيع كل شيء بحتاجوه الطلاب اسال فيها
كيف بدي اعرف وين القاعة وباي طابق بدون ل ادور بكل الطوابق ؟؟؟
الجواب : اسماء القاعات ليست عشوائية بالغالب , بس ممكن تبعتلنا بالجروب اسم جامعتك مع اسم القاعة الي بدك ياها ومنوضحلك كيف نظام القاعات بالجامعة تبعتك
كيف فيني اكون الاول على دفعتي كتيير حابه اكون متميزة بالجامعه بس الكل بخوفني من التكنو وبحكو مستحيييل شو ما درست شو ما درست تجيب معدل بدي حدا بالتكنو ويكون من اوائل دفعتو يحكيلي كيف فيني اكون متلو غير اني ادرس شو
اعمل كمان ؟؟
الجواب : اهم شيء الالتزام بالدراسة اولا باول وما تراكم عليك اي محاضرة اطلاقا .. التركيز على الدراسة من مصدر واحد وما تشتت نفسك وتحاول تحل اسئلة قدر الامكان.. نظام التكنو بالامتحانات عبارة عن نظام امتحان اول , امتحان ثاني , امتحان فاينل .. فالطالب اثناء الفصل ما بحس بالوقت اطلاقا , بخلص امتحان بقدم امتحان .. لهيك يمكن الطلاب بتتعب وبتحس الجامعة صعبة بس اذا بدأت الفصل صح وشديت حيلك من اولها بتقدر تستمر لاخر الفصل باذن الله
مش عارفة كيف راح ندرس حاسة بما انها حياة جديدة راح نلتهي كتير لبين ما نوخد عل الجو و ندرس هادا مخوفني !!؟؟ كيف
ازا في مواد ما فهمناها , ببالي سؤال بضحك بحب اكون محضرة يعني عندي خلفية عن المحاضرة كيف مو عارفة ؟؟
الجواب : راح تتاقلموا سريعا باذن الله وتشوفوا كيف الامور بتمشي بكل بساطة , بالنسبة للتحضير , من اول يوم دوام بالجامعة الدكاترة في اي مادة بيعطوكم خطة للمادة , الخطة فيها توضيح لكل محاضرة شو راح تاخدو فيها وتوزيع العلامات وشو المصدر الي مطلوب منكم تدرسو منو .. فبتقدري بكل سهولة تحضري باذن الله .. وحتى ما يكون المصطلح غريبsyllabus عليكم .. بالجامعة كلمة خطة بسموها
هلأ كيف ممكن انو نربط بين دراستنا ونشاطاتنا بالجامعة خاصية بالسنة الأولى بما انكم بدكم ايانا أوائل الدفعات ان شاء الله؟؟؟!!!!!!!!!!!!!!!!!
الجواب : الموضوع بختلف من طالب لاخر , لازم كل طالب يكون عندو سلم من الاولويات .. اول شيء دراستو , اذا ماشي فيها .. تمام والامور ضابطها صح بقدر بعد هيك يشوف نشاطات تانية .. لكن ما يعمل اي نشاط على حساب دراستو ..في طلاب بتقدر توافق بين دراستها وبين نشاطات واكتر من امر وفي طلاب لا .. تبقى المسألة قدرات بالنهاية
كيف نحصل ع الكتب؟
الجواب : كل جامعة فيها مركز لبيع الكتب بسموه بوك شوب , ممكن تشتري منو , او ممكن تشتري من مكتبات متخصصة في بيع الكتب الجامعية موجودة بجانب الجامعات كمان
انه انا سجلت بالتكنو وخايفه منها كتير قد ما بحكولي صعيه والدكاترة كتيير معقدين وحاسه نفسيتي كتيييييير تعبت
الجواب : مافي جامعة صعبة وجامعة سهلة , كل مكان الو صعوبتو .. بس الموضوع بعود للطالب نفسو يقدر يتاقلم ويتعامل مع الظروف بحيث يستفيد من سنوات الجامعة قدر الامكان وما تخلي حد يحبط معنوياتك .. تجارب الناس مش ضروري تكون نفسها تجربتك .. اجعلي لنفسك تجربة خاصة فيكي .
bottom of page